అన్నా హజారే ఒక్క అవినీతిమీదే ఎందుకింత స్పందించారు?

నూతన ఆర్థిక విధానాల ప్రభావంతో ప్రంపంచీకరణ , సరళీకరణ, ప్రయివేటీకరణ వల్ల జరిగిన దుష్పరిణామాలపై అన్నా హజారే ఎందుకు స్పందించలేదు? ఆయనకు అవి అర్థం కాలేదా? అర్థం అయినా ఎందుకులే అనుకున్నారా?. విద్యా, వైద్యం, ఉపాధి సామాన్యులకు అందనంత దూరం అవుతున్నాయి. ఆయనొక సామాజిక కార్యకర్త సమాజంలోని సామాజిక అసమానతలు కనబడలేదా? ప్రయివేటీకరణ పుణ్యమాని ఎస్సీఎస్టీబీసీల కోసం రాజ్యాంగంలోని నిర్థేశించుకున్నవి అమలు ఎందుకు కావడంలేదో తెలియదా? సరళీ కరణతో పాశ్చాత్య సంస్కృతి విచ్చలవిడిగా విస్తరిస్తూ సహజసిద్దమైన వనరులన్నీ నాశనమై గ్రామీణ వ్యవస్థ దెబ్బతింటోంది. మానవ సంబంధాలు దెబ్బతిన్నాయి. ఇంకా దెబ్బతింటూనే ఉన్నాయి. వాటిపై అన్నా హజారే ఎందుకు స్పందించ లేదు. అన్నా హజారే భారత సైన్యంలో పని చేశారు. దేశరక్షణ గురించి బాగా తెలుసు దేశ రక్షణకు భంగం వాటిల్లే ఒప్పందాలను అమెరికాతో చేసుకుంటుంటే ఎందుకు స్పందించలేదు. మహారాష్ట్రలోని అహ్మద్‌నగర్‌ జిల్లా రాలేగావ్‌సిద్ధి గ్రామ నిర్మాణంలో కీలక పాత్ర పోషించిన ఆయన సౌరశక్తి, జీవ ఇంధనం, పవన విద్యుత్‌ ఉత్పత్తి చేసేందుకు నడుంబిగించారు. అంటే ప్రకృతిని కాపాడాలనే ఆలోచన ఆయనకుందనే కదా? మరి ప్రమాదకరమైన అణుఒప్పందం భారత ప్రభుత్వం చేసుకున్నప్పుడు ఎందుకు స్పందించలేదు. ఆయన చేసిన పనిమీదే ఆయనకు నమ్మకం లేదా? దేశంలో స్వయం ప్రతిపత్తి గల రాలేగావ్‌ సిద్ధి గ్రామాన్ని మొదటిస్థానంలో నిలిపినందుకు ఆయనను భారత ప్రభుత్వం అత్యున్నత పద్మభూషణ్‌ అవార్డుతో సత్కరించింది. ఇదంతా చేయగలిగిన ఆయన ప్రమాదకరధోరణుల సమయంలో ఎందుకు నోరు మెదపలేదు.
అన్నా హజారే ఒక్క అవినీతిమీదే ఎందుకు దీక్ష చేశారు. అన్నింటికీ మూలం అవినీతే అనుకుంటున్నారా? ఏటేటా పాలకులు తీసుకుంటున్న నిర్ణయాలు, ఉత్తర్వుల వల్ల జరుతున్న పరిణామాలపై స్పందించాల్సిన అవసరం లేదా?. మాజీ ఐపీఎస్‌ కిరణ్‌బేడీ, సామాజిక వేత్త అగ్నివేష్‌, ఆర్‌టిఐ విప్లవవేత్త అరవింద్‌ కెజ్రావాల్‌ హజారేకు తోడుగా నిలిచారు. వీరికయినా ఎందుకు ఈ పరిస్థితులన్నీ అర్థం కాలేదు. రాజకీయాలకు అతీతులనీ, స్వచ్చందంగా ముందుకొచ్చి జనలోక్‌పాల్‌ బిల్లుకోసమని పోరాడారని ఎక్కువమంది నమ్ముతున్నారు. అందులోని తోతుపాతులను అధ్యయనం చేసేంత తీరిక లేదేమో అనిపించింది. సరే ముందుముందు అన్నీ బయటపడుతాయిగా అప్పటికైనా ఎవరి పోరాటం వెనుక ఏముందో అర్థమవుతుంది. ఒకప్పుడు నూతన ఆర్థిక విధానాలను వ్యతిరేకించిన వారిని వితండవాదులు అన్నారు. కొన్నాళ్ల తరువాత అందరూ వ్యతిరేకించక పోయినా ఒక్కో సందర్భంలో గొంతుకలిపారు.
సరే అదంతా అటుంచితే జనలోక్‌పాల్‌ బిల్లు అంటే ఏమిటీ? : ఈ బిల్లును 1972లో అప్పటి న్యాయశాఖ మంత్రి శాంతిభూషణ్‌ పార్లమెంటులో ప్రతిపాదించారు. మారుతున్న పాలకులు దీనిని పక్కన పెడుతూ వచ్చారు. కొందరు అవినీతి పరులు ఆబిల్లును మార్చాలని కూడా ప్రయత్నించారు. ఈబిల్లు అమలయితే కేంద్రం ఒక లోక్‌పాల్‌ను ఎన్నుకోవాలి. లోక్‌పాల్‌ బిల్లును డ్రాప్టు చేయడానికి 50 శాతం ప్రభుత్వం నుంచి , 50 శాతం ప్రజల తరుపున కూడిన సంయుక్త కమిటీని ఏర్పాటు చేయాలి. అవినీతిని అంతమొందించడంలో ప్రభుత్వాన్ని ఊర్తిగా నమ్మడం సాధ్యం కాదని ఈ విధంగా కమిటీని వేయాల్సి ఉంటుంది. ప్రభుత్వంలో ఉండే కొందరు అవినీతి పరులు చట్టం కళ్లుగప్పి తప్పించుకునే ప్రమాదం ఉంది. భారత ఎన్నికల కమిషన్‌కు ఉన్నంత స్వయంప్రతిపత్తి లోక్‌పాల్‌బిల్లుకు కలిగి ఉండాలి. అలా ఉంటేనే ఏడాదిలోపు అందరి అవినీతి పరులను గుర్తించే అవకాశం ఉంది. రెండేళ్లలో అందరికీ శిక్షపడేలా చేయడం సాధ్యమవుతుంది. బిల్లుపాస్‌అయితేనే అవినీతిని అంతమొందించే అవకాశం ఉంది. ఇదంతా పార్లమెంటు మీద ఆధారపడి ఉంది. దేశాన్ని పట్టిపీడిస్తున్న అవినీతిని అంతమొందించడానికి సాధ్యమవుతుంది. సరే ఏంచేస్తారో వేచి చూద్దాం. అన్నా హజారే ప్రయత్నం ఫలించాలని కోరుకుందాం. పోరాటం ఏదయినా మద్దతు ఇవ్వాల్సిందే. ప్రమాదకరమైన అన్నింటిమీద ఆయనెందుకు స్పందించలేదనేదే నాప్రశ్న.

సత్యసాయిబాబా ఆరోగ్యం ఆందోళనకరం

''సత్యసాయి బాబా ఆరోగ్యం ఆందోళనకరంగానే ఉంది. కీలక అవయవాలేవి వాటంతట అవి పనిచేసే పరిస్థితుల్లేవు. కృత్రిమ సహకారంతోనే పనిచేయిస్తున్నాం., అయినా బాబా ఆరోగ్య పరిస్థితి నిలకడగానే ఉంది'' అని వైద్యులు చెబుతున్నప్పటికీ ముప్పు తప్పిందని మాత్రం ఘంటాపథంగా చెప్పలేకపోతున్నారు. బుధవారం సాయంత్రం పుట్టపర్తి పట్టణంలోని సాయి ఆరామం అతిథి గృహంలో రాష్ట్ర వైద్య ఆరోగ్య శాఖ ముఖ్య కార్యదర్శి పివి.రమేష్‌, వైద్యవిద్యాశాఖ డైరెక్టరు డాక్టర్‌ రవిరాజు, సత్యసాయి సూపర్‌ స్పెషాలిటీ ఆసుపత్రి డైరెక్టరు డాక్టరు సఫాయ మాట్లాడారు. బాబా ఆరోగ్యం పట్ల ఆందోళన చెందాల్సిన పనిలేదని, నిలకడగానే ఉందని చెప్పారు. బాబా ఆరోగ్యం గురించి వైద్య బృందం ఆహర్నిశలు శ్రమిస్తున్నా రని చెప్పారు. వారు తెలిపిన సమాచారం మేరకు అవయవాల పనితీరు ఈ విధంగా ఉంది.

గుండె పనితీరు బాగుంది...

సత్యసాయి బాబా గత నెల 28న గుండె కొట్టుకోవడంలో తేడాలొచ్చినందువల్ల సత్య సాయి సూపర్‌ స్పెషాలిటీ ఆసుపత్రిలో చేర్పించారు. ఆ సమయంలో ఆయనకు పేస్‌మేకర్‌ అమర్చి గుండె పనితీరు మెరుగుపరిచారు. ప్రస్తుతం ఆయన హృదయ స్పందన బాగుంది. గుండె రక్తాన్ని పంప్‌ చేయడం కొంత తగ్గింది. తద్వారా బిపి తగ్గుతోంది. దీనికి
మందులు వాడుతున్నారు. దీని వల్ల బిపి సాధారణంగానే ఉంటోంది. ప్రస్తుతం 130/60, 140/70గా బిపి ఉంటోంది. ఇది సాధారణ వ్యక్తి తరహాలోనే ఉన్నట్టు వైద్య, విద్య డైరెక్టరు రవిరాజు పేర్కొన్నారు.

వెంటిలేటరు సహకారంతో..

గుండె పనితీరు మెరుగుపడిన తరుణంలో బాబా ఊపిరితిత్తులకు ఇన్‌ఫెక్షన్‌ ప్రబలింది. నీరు చేరి శ్వాస తీసుకోవడం ఇబ్బందిగా మారింది. ఆయనకు వెంటిలేటర్‌ ద్వారా కృత్రిమంగా శ్వాస అందిస్తున్నారు. దీని వల్ల శ్వాస తీసుకోవడంలో ఎటువంటి ఇబ్బంది కలగలేదు. ఆక్సిజన్‌ కూడా శరీరానికి బాగా అందుతోంది. అయితే వెంటిలేటర్‌ తీసేస్తే ఏ మేరకు శ్వాస తీసుకోగలరో చెప్పలేని పరిస్థితుల్లో వైద్యులున్నారు.

సిఆర్‌టిటి ద్వారా మూత్రపిండాలకు వైద్యం...

శ్వాసకోస సమస్యలకు పరిష్కారం చేసేలోపే మూత్రపిండాల పనితీరు మందగించింది. ఇవి పనిచేయకపోవడంతో మూత్రం వచ్చే పరిమాణం తగ్గింది. ఫలితంగా శరీరంలోకి నీరు చేరింది. సిఆర్‌టిటి ద్వారా డయాలసిస్‌ చేసి శరీరంలోని నీటినంతటినీ తొలగించారు. దీని ద్వారా శరీరంలో చేరిన మలినాలను కూడా తీసివేస్తున్నారు. కాళ్లు, చేతులు, మొహం వాపు తగ్గి సాధారణ పరిస్థితికి వచ్చింది. ఈ విధానాల ద్వారా మూత్రపిండాల పనిని కృత్రిమంగా చేయవచ్చునని చెబుతున్నారు. మూత్రంలో యూరియ, సోడియం, పొటాషియం స్థితి కూడా సాధారణంగానే ఉన్నట్టు వైద్యులు తెలిపారు.

కీలక అవయవాల పని తీరిలా...

సాయిబాబా ఆరోగ్యం ప్రస్తుతానికి నిలకడగా ఉన్నప్పటికీ ఆందోళన మాత్రం తప్పలేదు. ఎందుకంటే కీలక అవయవాలన్నీ కృత్రిమ సహకారంతోనే పనిచేస్తున్నాయి. వీటిని తొలగిస్తే అవి ఏ మేరకు పనిచేస్తాయన్నది చెప్పలేని పరిస్థితుల్లో వైద్యులున్నారు. ఆసుపత్రిలో చేరినప్పటి నుంచి ఇప్పటి వరకు చూస్తే మూత్రం చాలా తక్కువగా వస్తున్నట్టు తెలిపారు. అదే విధంగా శరీర ఉష్టోగ్రత 99 నుంచి 100 వరకు ఉంటోందని చెప్పారు. న్యుమోనియా వల్ల శరీరంలోని కొన్ని భాగాలకు ఇన్‌ఫెక్షన్‌ వచ్చినట్టు కూడా రవిరాజు తెలిపారు. ఈ ఇన్‌ఫెక్షన్‌ శరీరంలో వ్యాప్తి చెందకుండా అవసరమైన జాగ్రత్తలు తీసుకుంటున్నట్లు చెప్పారు. బాబా ఏ మేరకు స్పృహలో ఉన్నారో కూడా చెప్పలేమని, ఇవన్నీ ఆందోళన కలిగిస్తున్న అంశాలేనని ఆయన చెప్పారు. మొత్తమ్మీద బాబా ఆరోగ్య పరిస్థితి నిలకడగానే ఉందని చెప్పాలన్నారు. ఎంతకాలంలో కోలుకోవచ్చని విలేకరులు అడిగిన ప్రశ్నకు వారి నుంచి స్పష్టమైన సమాధానం లభించలేదు. ఎంత సమయం పట్టవచ్చన్నది ఎవరూ చెప్పలేమన్నారు. అయితే తొందరలోనే కోలుకుంటారని అందరం ఆశిద్దామన్నారు.

ప్రభుత్వ సహకారం బాగుంది... : డైరెక్టరు సఫాయా

సత్యసాయిబాబా ఆరోగ్యం విషయంలో రాష్ట్ర ప్రభుత్వం పూర్తి స్థాయిలో సహకారం అందిస్తోందని చెప్పారు. తమ వైద్యులకు తోడు ప్రభుత్వ వైద్య బృందం కూడా సహకారాన్ని అందిస్తోందని చెప్పారు. మెరుగైన వైద్యం కోసం బాబాను ఎక్కడికైనా తీసుకెళ్లే ఆలోచనుందా అని విలేకరులు అడిగిన ప్రశ్నకు ఆయన సమాధానం చెబుతూ అటువంటిదేమీ లేదన్నారు. ఇక్కడి సూపర్‌ స్పెషాలిటీ ఆసుపత్రిలోనే అన్ని రకాలైన వైద్య సౌకర్యాలున్నాయని చెప్పారు. అంతేకాకుండా ఆయన భక్తులుగానున్న ప్రముఖ వైద్యులు చాలా మంది ఉన్నారన్నారు. వారందరూ ఆయన ఆరోగ్యం కోసం కష్టపడుతున్నారని చెప్పారు.

సత్యనారాయణ రాజు నుంచి సత్యసాయి బాబాగా

అనంతపురం జిల్లాలోని పుట్టపర్తి అనే కుగ్రామంలో 1926 నవంబరు 23న సత్యనారాయణ రాజు (సత్యసాయిబాబా) జన్మించారు. తనకుతానే బాబా అని ప్రకటించుకుని ప్రపంచ ఆధ్యాత్మికవేత్తగా సత్యసాయిబాబా ఎదిగారు. ఈ క్రమంలో అనేక ఒడిదుడుకులు, విమర్శలను, ఆరోపణలను సైతం సత్యసాయిబాబా ఎదుర్కొన్నారు. వాటన్నింటినీ అధిగమించి ప్రపంచ ప్రఖ్యాతిగాంచిన ఆధ్యాత్మికవేత్తగా నిలిచారు. ప్రపంచవ్యాప్తంగా ఆయనకు భక్తులున్నారు.

బాల్యం గడించింది ఇలా...

అనంతపురం జిల్లా పుట్టపర్తిలో ఈశ్వరమ్మ, పెద్దవంకమరాజు రత్నం దంపతులకు 1926 నవంబరు 23న సత్యనారాయణరాజు జన్మించారు. చిన్నప్పటి నుంచి పెద్దసోదరుడు శేషమరాజు వద్దనే ఉంటూ వచ్చారు. ఆయన వృత్తిరీత్యా ఉపాధ్యాయుడు కావడంతో సత్యనారాయణరాజు విద్యాభ్యాసం కూడా ఒక్కొక్క చోటు జరుగుతూ వచ్చింది. పుట్టపర్తి సమీపంలో ఉన్న బుక్కపట్నంలో ప్రాథమిక విద్యను అభ్యసించారు. అనంతరం ఉరవకొండలో ప్రాథమికోన్నత విద్య అభ్యసించారు. ఈ క్రమంలోనే 14 ఏళ్ల తరుణంలో ఒక రోజు సత్యనారాయణ రాజుకు తేలు కుట్టింది. అప్పటి నుంచి ఆయన మానసిక పరివర్తనలో మార్పు వచ్చింది. ఏదేదో మాట్లాడుతుండే వాడు. దీంతో ఆయన సోదరుడు శేషమరాజు ఆయన్ను తన స్వగ్రామమైన పుట్టపర్తికి పంపించారు. కొద్దిరోజులు తరువాత తాను దేవుడినని, తన పేరు ఇక నుంచి సత్యసాయిబాబా అని 1940లో ప్రకటించుకున్నారు. అప్పటి నుంచి సత్యనారయణ రాజు కాస్త సత్యసాయిబాబాగా పిలువబడుతూ వచ్చారు. అనంతరం ఆయన దక్షిణ, ఉత్తర భారతదేశ ప్రాంతాల్లో యాత్రలు చేపట్టారు. తిరిగొచ్చాక కొన్ని మహిమలు చూపడంతో భక్తులు ఆయన పట్ల ఆకర్షితులయ్యారు. ఆయన్ను చూసేందుకు పెద్దసంఖ్యలో భక్తులు వచ్చేవారు. 1944లో ఆయనకు మొట్టమొదటిసారిగా పుట్టపర్తిలో మందిరాన్ని నిర్మించారు. దీన్ని ప్రస్తుతం మందిరంగా పిలుస్తున్నారు. 1948లో ప్రశాంతి నిలయాన్ని నిర్మించారు. అప్పటి నుంచి క్రమక్రమంగా బాబా గురించి దేశవ్యాప్తంగా తెలియడంతో భక్తులు వేల సంఖ్యలో వచ్చేవారు. 1968లో మొట్టమొదటిసారి విదేశీ పర్యటన చేపట్టారు. క్రమక్రమంగా అక్కడి నుంచి కూడా విదేశీ భక్తులు పుట్టపర్తికి రావడం పెరిగింది.

విమర్శలు, ఆరోపణలు...

సత్యనారాయణ రాజు నుంచి సత్యసాయిబాబాగా ఎదిగే క్రమంలో ఆయనపై అనేక విమర్శలు, ఆరోపణలు వెల్లువెత్తాయి. జాతీయ, అంతర్జాతీయ మీడియాలో సైతం అనేక వ్యతిరేక కథనాలు వచ్చాయి. అన్నింటికంటే ఎక్కువగా విమర్శలకు గురిచేసింది 1993 జూన్‌ 6న ఆశ్రమంలో జరిగిన ఆరు హత్యలు. బాబా నిద్రించే గదిలోనే ఇద్దరు యువకులు తుపాకీతో కాల్చి హత్య గురికావడం అప్పట్లో పెద్ద సంచలనమే రేపింది. ఇక్కడ జరుగుతున్న అసాంఘిక కార్యక్రమాలను బయటపెట్టేందుకు ప్రయత్నించినందునే వారిని కాల్చి చంపారని అప్పట్లో విమర్శలు గుప్పుమన్నాయి. ఇకపోతే నోటిలో నుంచి శివలింగం తీయడం, గాలిలో విబూది తీయడం వంటివన్నీ మహిమలు కాదని, మ్యాజిక్‌ మాత్రమేనని ప్రముఖ హేతువాది ప్రేమానంద్‌ పేర్కొన్నారు. చంద్రుడు తన ప్రతిరూపం కనిపిస్తుందని అంతకు ముందు ఏడాది ప్రకటించి కనబడకపోవడం కూడా విమర్శలకు దారితీసింది. ఈ ఆరోపణలేవీ ఆయన్ను పెద్దగా అడ్డుకోలేకపోయాయి. 2004లో బిబిసి అంతర్జాతీయ మీడియా ఛానల్‌ 'ది సీక్రెట్‌ స్వామి' అనే పేరుతో ఒక కథనాన్ని వెలువరిచింది. వీటన్నింటినీ సత్యసాయిబాబా భక్తులు తిప్పికొట్టగలిగారు.

ప్రపంచ వ్యాప్తంగా సేవా సమితులు...

సత్యసాయి సేవా సమితులు ప్రపంచ వ్యాప్తంగానున్నాయి. 126 దేశాల్లోని 1200 చోట్ల సత్యసాయి సేవా కేంద్రాలు ఉన్నాయి. వీటి ద్వారానే సత్యసాయి బాబా ట్రస్టు కార్యకలాపాలన్నీ జరుగుతూ ఉంటాయి. ప్రపంచ వ్యాప్తంగా ప్రచార కార్యక్రమాలే కాకుండా పుట్టపర్తిలోని ట్రస్టు కార్యకలాపాలన్నీ సేవాసమితి ఆధ్వర్యంలో నడుస్తుంటాయి. భద్రత మొదలుకుని అన్నీ కూడా సమితి సభ్యుల కనుసన్నల్లోనే నడుస్తాయి. ట్రస్టు లోపలి భాగంలో పోలీసులకు సైతం ప్రవేశం ఉండదు.

సేవా కార్యక్రమాలు...

సత్యసాయి బాబా ఏర్పాటు చేసిన 'సత్యసాయి సెంట్రల్‌ ట్రస్టు' ఆధ్వర్యంలో అనేక సేవా కార్యక్రమాలు జరుగుతున్నాయి. విద్య, వైద్యం అందులో ప్రధానమైనవి. సూపర్‌ స్పెషాలిటీ ఆస్పత్రిని స్థాపించి పేదలకు ఉచితంగా వైద్యసేవలందిస్తున్నారు. వీటితోపాటు పలు జిల్లాలకు తాగునీటి వసతిని ఏర్పాటు చేశారు. అనంతపురం, మహబూబ్‌నగర్‌, మెదక్‌ జిల్లాల్లో తాగునీటి ప్రాజెక్టులు చేపట్టారు. చెన్నై నగరానికి తాగునీటి ప్రాజెక్టును చేపట్టారు. ఒరిస్సాలో 2008లో వరదలతో దెబ్బతిన్న ప్రాంతాల్లో సహాయ చర్యలను చేపట్టారు.

ఇటీవలే వైభవంగా 85వ జన్మదిన వేడుకలు...

ప్రతి ఐదేళ్లకు ఒకసారి సత్యసాయి బాబా జన్మదిన వేడుకలు వైభవంగా నిర్వహించడం అనవాయితీ. 2010 నవంబరు 23న 85వ జన్మదిన వేడుకలు అత్యంత వైభవంగా జరిగాయి. వారం రోజులపాటు జరిగిన ఈ వేడుకల్లో మహిళా దినోత్సవానికి భారత రాష్ట్రపతి ప్రతిభాపాటిల్‌ ముఖ్య అతిథిగా పాల్గొన్నారు. అనంతరం నవంబరు 22న సత్యసాయి డీమ్డ్‌ యూనివర్శిటీ స్నాతకోత్సవానికి భారత ప్రధాని మన్మోహన్‌ సింగ్‌ హాజరయ్యారు. 23న జరిగిన జన్మదిన వేడుకలకు కేంద్ర మంత్రి ఎస్‌ఎం కృష్ణ, టాటా గ్రూపు సంస్థల అధినేత రతన్‌టాటా తదితరులు హాజరయ్యారు.

సత్యసాయి వారసులెవరు?

సత్యసాయి బాబా ఆరోగ్య పరిస్థితి క్షీణిస్తుండటంతో ఇప్పుడు అందరి దృష్టి పుట్టపర్తివైపే పడింది. భక్తి , మహిమలు ఎలాగున్నా లక్షల కోట్ల రూపాయల ఆస్తులను బోగు చేశారు. వాటితో అనేక సేవాకార్యక్రమాలు నిర్వహిస్తున్నారు. వాటిని కాపాడి ప్రభుత్వ పరం చేయడానికి తగిన శ్రద్ద చూపాల్సిన అవసరం ఉంది. ప్రపంచ ప్రఖ్యాతిగాంచిన పుట్టపర్తి నిర్వహణ పరిస్థితి భవిష్యతులో ఏ విధంగా ఉండబోతోందన్న చర్చసాగుతోంది. సత్యసాయిబాబా ఆరోగ్యంగా ఉన్నంత వరకు ఇటువంటి ఆలోచనే చేయని వారందరూ ఇకపై ఎలాగన్న చర్చమొదలైంది. ఈ కార్యక్రమాలన్నింటినీ ముందుకు తీసుకెళ్లే వారసుడు ఎవరన్నది ట్రస్టులోని ముఖ్యులు ఆలోచిస్తున్నట్లు సమాచారం. శ్రీ సత్యసాయి సెంట్రల్‌ ట్రస్టు ఆధ్వర్యంలో ఇప్పటి వరకు కార్యక్రమాలు జరిగాయి. ఈ ట్రస్టుకు సత్యసాయి బాబానే అధ్యక్షులుగావున్నారు. కార్యదర్శిగా చక్రవర్తి ఉన్నారు. తొమ్మిది మంది సభ్యులున్నారు. వారిలో ఎక్కువగా తమిళనాడుకు చెందినవారున్నారు. భక్తులుగా చేరిన వారు క్రమంగా ట్రస్టు సభ్యులుగా మారారు. ఈ సభ్యుల్లో సత్యసాయి బాబా సోదరుడు జానకిరామయ్య కుమారుడు రత్నాకర్‌ ఒకరుగానున్నారు. సత్యసాయిబాబాకు ఆయనంటే అమితమైన అభిమానముండేది. కాని ఆయన్ని వారసుడిగా ఇప్పటి వరకు బాబా ఎక్కడా ప్రకటించిన దాఖలాల్లేవు. బాబా ఆరోగ్య పరిస్థితి తీవ్రంగా క్షీణించింది. ఆయన కోలుకున్నప్పటికీ ఇకపై ట్రస్టు నిర్వహణకు సంబంధించిన కార్యకలాపాలపై ఏ మేరకు దృష్టి సారించగలరో చెప్పలేని పరిస్థితి. దీంతో నాయకత్వ బాధ్యతలను మరొకరు తీసుకునే అవకాశాలున్నాయి. అటువంటి పరిస్థితే గనుక వస్తే ఎవరిని సత్యసాయి వారసునిగా ప్రకటిస్తారో అంతుబట్టడం లేదు. ఈ విషయంలో ట్రస్టు వర్గాల్లోనూ భిన్నాభిప్రాయలున్నట్లు తెలుస్తోంది. ట్రస్టు కార్యదర్శిగానున్న చక్రవర్తి ఇప్పటి వరకు అన్నీ తానై వ్యవహరిస్తూ వచ్చారు. అయితే ఆయన పట్ల కొంత మంది వ్యతిరేక భావంతోనున్నట్టు తెలుస్తోంది. ఇదే సమయంలో బాబా సోదరుడి కుమారుడు రత్నాకర్‌ రాజును కూడా వారసుడిగా ప్రకటించే పరిస్థితుల్లేవు. ఈ విషయంలో ఇప్పటికే ట్రస్టు సభ్యుల మధ్య భేదాభిప్రాయలున్నట్టు తెలుస్తోంది. రత్నాకర్‌ రాజును ట్రస్టు సభ్యులు దూరంగా ఉంచుతున్నారన్న ప్రచారం సాగుతోంది. బాబా ఆరోగ్య పరిస్థితిని స్వయంగా పర్యవేక్షించేందుకు కూడా కొంత మంది నిరాకరిస్తున్నట్టు తెలిసింది. ఈ విషయంలో శుక్రవారం రాత్రి రత్నాకర్‌ రాజు ఆసుపత్రి వైద్యులతోనూ, ట్రస్టు సభ్యులతోనూ స్వల్ప వాగ్వాదం జరిగినట్టు తెలుస్తోంది. కొంత మంది కలుగజేసుకుని సర్ధిజెప్పడంతో తాత్కాలికంగా ఇది సద్దుమణిగినట్టు సమాచారం. ఇదిలావుండగా సోమవారం ఆరుగురు ఉన్నతస్థాయి న్యాయనిపుణులు పుట్టపర్తికి వస్తున్నట్టు సమాచారం. వీరు బాబాను కలిసేందుకు వస్తున్నారా లేక ట్రస్టులో తలెత్తబోయే సమస్యలను పరిష్కరించేందుకు వస్తున్నారా? అన్నది తెలియాల్సుంది. మొత్తం మీద భవిష్యత్తులో సత్యసాయి సేవా ట్రస్టు కార్యకలాపాలు ఏ విధంగా ఉండబోతున్నాయన్న ఆందోళన అటు భక్తుల్లోనూ, సామాన్య ప్రజల్లోనూ నెలకొంది.

శ్రీఖర నామ ఉగాది శుభాకాంక్షలు

మనం నిత్యం జరుపుకునే పండుగలు, ఉత్సవాలు, జాతరలు, కొలువులు తదితరాలు మన సంస్కృతిలో భాగం. పండుగలు ఉత్సవాలు అన్నీ మత పరమైనవి కావు. కొన్ని పండుగలు పూర్తిగా మానవుని ఉత్పత్తికి సంబంధించినవి. అంటే వ్యవసాయం, పశుపోషణ వంటి వాటికి సంబంధించి ఉంటాయి. కొన్ని ప్రకృతిపై మానవుడు విజయం సాధించిన సందర్భాన్ని పురస్కరించుకుని జరుగుతుంటాయి. కొన్ని పండుగలు మత నమ్మకాలు, కథలపై ఆధారపడి ఉంటాయి. అందువల్ల పండుగలు, ఉత్సవాలు, జాతరలు వంటి వాటిని మూఢ నమ్మకాలని కొట్టి పారేయలేం. ఉగాది కూడా వ్యవసాయం అధారమైన పండుగ. ఉగాది తెలుగువారు జరుపుకునే ముఖ్యమైన పండుగ. ఉగాదిరోజు నుంచి తెలుగు సంవత్సరం మొదలవుతుంది. కాబట్టి ఇది తెలుగువారి తొలిపండుగ. ఉగాది రోజున కొత్తగా పనులు ప్రారంభించుట పరిపాటి. ఉదయాన లేచి, తలంటి స్నానం చేసి, కొత్తబట్టలు ధరించి ఉగాది పచ్చడితో దినచర్యను ప్రారంభిస్తారు. దేవస్థానానికి వెళ్లి పూజలు చేస్తారు. కొత్త సంవత్సరంలో రాశీఫలాలు, గ్రహస్థితులు ఎలా ఉన్నాయో తెలుసుకుని గ్రహశాంతుల లాంటివి చేసి సుఖంగా ఉండటానికి పంచాంగ శ్రవణం చేస్తారు. ఈ పండుగ ఒక్క తెలుగు సాంప్రదాయంలోనే కాక పరాఠీలు గుడిపడ్వాగానూ, తమిళులు పుత్తాండు అనే పేరుతో, మళయాళీలు విషు పేరుతో, సిక్కులు వైశాఖీగానూ, బెంగాలీలు బైశాఖ్‌ గాను జరుపుకుంటారు.

ఉగాది ప్రాముఖ్యం: చైత్రశుద్ధ పాడ్యమి రోజున బ్రహ్మ సృష్టిని నిర్మించడం ప్రారంభించారని నమ్ము తారు. మత్స్యావతారం ధరించిన విష్ణువు సోమకుని సంహరించి వేదాలను బ్రహ్మకప్పగించిన సందర్భంగా ఉగాది ఆచరణలోకి వచ్చిందని పురాణ ప్రతీతి. బ్రహ్మదేవుడు ఈజగత్తును చైత్రమాస శుక్లపక్ష ప్రథమ దినాన సూర్యోదయవేళ సమగ్రంగా సృష్టించాడంటారు. అంటే కాలగణాన్ని గ్రహ, నక్షత్ర, రుతు, మాస వర్షాదికులను బ్రహ్మదేవుడు ఈనాడు ప్రవర్తింప చేశాడన్నది పెద్దల భావన. అంతేకాదు వసంత రుతువు కూడా అప్పుడే మొదలవుతుంది. అందుకే కొత్తజీవితానికి నాందికి గుర్తుగా ఉగాది పండుగను జరుపుకుంటారు. శాలివాహనుడు పట్టాభిశషిక్తుడైన దినం కారణంగా ప్రాశస్త్యంలోకి వచ్చిందని మరో కథ ఉంది. ఉగాది , యుగాది అనే రెండు పదాలు వాడుకలో ఉన్నాయి. ఉగ అనగా నక్షత్ర గమనం. నక్షత్ర గమనానికి ఆది ఉగాది అంటే సృష్టి ఆరంభమైన దినమే ఉగాది. యుగము అనగా ద్వయము లేక జంట అని కూడా అర్థం. ఉత్తరాయణ, దక్షిణాయనములనబడే ఆయన ద్వయ సంయుతం యుగం (సంవత్సరం) కాగా , ఆ యుగానికి ఆది (సంవత్సరాది) యుగాది అయింది. యుగాది శబ్ధానికి ప్రతిరూపమైన ఉగాదిగా ఆచరణీయమని నిర్ణయసింధుకారుడు పేర్కొన్నాడు.

సంప్రదాయాలు: ప్రతి సంవత్సరం చైత్రమాసంలో శుక్లపక్షంలో పాడ్యమి తిథినాడు ఈ ఉగాది పండుగను జరుపుకుంటారు. నిర్ణయసింధు ధర్మ సింధులలో దీనికి సంబంధించిన ప్రమాణాలు కనిపిస్తున్నాయి. ఉగాది రోజు తైలాభ్యంగనం, నూతన సంవత్సరాది స్తోత్రం, ఉగాది పచ్చడి సేవనం, ధ్వజారోహణం (పూర్ణకుంభదానం), పంచాంగ శ్రవణం తదితర పంచకృత్య నిర్వహణ చేయాలని వ్రతగంధ నిర్ధేశితం, మామిడాకుల తోరణాలు కట్టడం. తలస్నానం చేయడం. కొత్తబట్టలు ధరించడం, పిండి వంటలు చేయడం,. పూర్వం నుంచీ వస్తున్న ఆచారం. ఆదాయ, వ్యయాలు, కందాయఫలాలు, రాశిఫలాలు తెలిపే పంచాంగం వినడం ఆనవాయితి. పల్లెల్లో రైతులు ఉగాది రోజున దేవాలయం వద్ద అంతాచేరి పురోహితుడిని పిలిపిస్తారు. తమ వ్యవసాయానికి ఏ కార్తెలో వర్షం పడుతుంది. గ్రహణాలు ఏమయినా ఉన్నాయా? ఏరువాక ఎప్పుడు సాగాలి? వంటివన్నీ అడిగి తెలుసుకుంటారు. మనకు తెలుగు సవంత్సరాలు ప్రభవతో మొదలుపెట్టి అక్షయ నామ సంవత్సరం వరకు గల 60 సంవత్సరాల్లో మానవులు తాము జన్మించిన నామసంవత్సరాన్ని వారి సన్మాంతర సుకృతాలను బట్టి జీవితంలో ఒక్కసారో రెండుసార్లో చూస్తుంటారు. అందువల్లనే జన్మించిన 60 సంవత్సరాలకు తిరిగి ఆనామ సంవత్సరం వచ్చినప్పుడు అది ఒక పర్వదినంగా భావించి షష్టిపూర్తి ఉత్సవాన్ని వైభవంగా చేసుకుంటారు.

చేసే పూజలు: అన్ని పండుగల లాగానే ఉగాది పండుగనాడు ఉదయాన తలస్నానం చేసి కొత్తబట్టలు ధరించి పూజ చేసుకుంటారు. అయితే ప్రత్యేకంగా ఫలాన దేవుడి పూజ అని ప్రస్తావించలేదు. గనుక ఈ రోజున ఇష్టదేవతాపూజ చేసుకుంటారు. ఆతరువాత ఏమీ తినకముందే ఉగాది పచ్చడి తింటారు.

ఉగాది పచ్చడి: ఈ పండుగకు మాత్రమే ప్రత్యేకంగా తినే పదార్థం ఉగాది పచ్చడి. ఉగాదినాడు షడ్రుచుల సమ్మేళనం. తీపి, పులుపు, కారం, ఉప్పు, వగరు, చేదు అనే ఆరురుచులు కలసిన ఉగాది పచ్చడి తింటారు. సంవంత్సరం పొడుగునా ఎదురయ్యే మంచి చెడులను, కష్టసుఖాలను సంయమనంతో స్వీకరించాలన్న సందేశాన్ని ఉగాది పచ్చడి ఇస్తుంది. ఈ పచ్చడి కోసం చెరుకు, అరటిపళ్లు, మామిడి కాయలు, వేపపువ్వు, చింతపండు, జామకాయలు, బెల్లం తదితరాలను వాడుతుంటారు. ఉగాది పచ్చడికి మన శాస్త్రాలలో '' నింబకుసు భక్షణం'' అశోకకళికా ప్రాశనం అని వ్యవహరించే వారు. రుతుమార్పు కారణంగా వచ్చే వాత, కప, పిత్త దోషాలను హరించే ఔషదంగా ఉగాది పచ్చడి తినే ఆచారం ఆరంభమైందంటూ ఉగాది పచ్చడిని శాస్త్రీయంగా తయారు చేసే పద్దతిలో ఉప్పు, వేప పువ్వు, చింతపండు, బెల్లం, పచ్చిమిరపకాయలు, మామిడి చిగుళ్లు, అశోకచిగుళ్లు వేసి చేసేవాళ్లు. ఈపచ్చడిని శ్రీరామ నవమి వరకు తినాలని శాస్త్రాలు చెబుతున్నాయి.  మంత్రం చదువుతూ ఉగాది పచ్చడి తినాలని శాస్త్రాలు చెబుతున్నాయి. పచ్చడి చేసే ఆచారం ఆహారంలో ఉండే ఔషద గుణాన్ని వృక్ష సంరక్షణ అవసరాన్ని ఆయుర్వేదానికి ఆహారానికి గల సంబంధాన్ని చెప్పడమే కాక పండుగలకు ఆచారాలకు సముచిత ఆహారానికి గల సంబంధాన్ని చాటి చెబుతుంది. ఉగాది రోజున తినే పచ్చడిలో కొత్తచింతపండు, లేత మామిడి చిగుళ్లు, ఆశోక వృక్షం చిగుళ్లు, కొత్తబెల్లం, వేపపూత, మామిడి కాయ ముక్కలు, చెరుకు ముక్కలు చిలకర లాంటివి ఉపయోగించాలి. ఈపచ్చడి శారీరక ఆరోగ్యానికి కూడా ఎంతో శ్రేష్టమని ఆయుర్వేద శాస్త్రం పేర్కొంటుంది. ఈపచ్చడిని కాలిపొట్టతో తీసుకున్నప్పుడు ఆరోగ్యానికి మంచిదంటారు. వేపపూత పచ్చడికి శాస్త్రంలో నింబకుసుమభక్షణం అని పేరుంది. సంవత్సరమంతా అనారోగ్యం లేకుండా హాయిగా ఉండేందుకు ఈపచ్చడి ఉపకరిస్తుందని వైద్యులు చెప్పే మాట. అయితే ఒక పూట తింటేనే అంతఫలితం వస్తుందా అని కొందరంటారు. కానీ ఈ వేపపూత పచ్చడిని సేవించడం చైత్రశుక్ల పాడ్యమినుంచి పూర్ణిమ వరకు గాని లేదా కనీసం ఉగాది పండుగనుంచి తొమ్మిది రోజులపాటయినా వసంత నవరాత్రుల వరకయినా సేవించాలి. అలా సేవిస్తే వాత, పిత్త, శ్లేస్మాల వల్ల ఏర్పడే దోషాలు హరిస్తాయి. కాలక్రమంలో ఉగాది పచ్చడిలో లేత మామిడి చిగుళ్లు, వేపపూత, బెల్లం ముక్కలను మాత్రం ఉపయోగించడం కనిపిస్తుంది. పూర్వం లేత వేపచిగుళ్లు ఇంగువ పొంగించి బెల్లం సైందవలవణం కలిపి కొద్దిగా నూరి చింతపండు, తాటిబెల్లం, పటిక బెల్లంగాని వాము, జిలకర్ర మంచి పసుపు కలిపి నూరేవారు. ఈమిశ్రమాన్ని అరతులం వంతున ప్రతిరోజు ఖాళీకడుపుతో ఉగాదినుంచి తొమ్మిది రోజులుగా పదిహేను రోజులు వీలును బట్టి సేవించాలి. ఉగాది పచ్చడితిన్న తరువాత శాస్త్ర విధిగా ఉగాది పండుగను జరుపుకునేవారు. పూర్ణకుంభ లేదా ధర్మకుంభదానాన్ని చేస్తుంటారు. ఈధర్మకుంభ దానం వల్ల సంవత్సరమంతా కోరిన కోరికలు తీరుతాయన్నది నమ్మకం.

ఉగాది ప్రసాదం: ఉగాది రోజున దేవునికి నైవేద్యం పెట్టవలసిన ప్రసాదంలో ముఖ్యంగా పానకం, వడపప్పు ఉంటాయి. ఉగాదితో వేసవి ఆరంభం అవుతుంది. వేసవి తాపం తట్టుకోడానికి పానకం లాంటి నీరాహారం తీసుకోవాలని గుర్తు చేస్తుంది. వడపప్పులో వాడే పెసర పప్పు చలవ చేస్తుందని, వేసవిలో కలిగే అవస్థలను తగ్గిస్తుంది. ఇలాంటి ఆహారాన్ని ఉగాది రోజునే కాక ఈ రుతువు మొత్తం తీసుకోవాలన్న సూచన ఈ ఆచారంలో ఇమిడి ఉంది. ఉగాదికి విసనకర్రలను పంచే ఆచారం ఉంది. ప్రస్తుత కాలంలో ఉన్న పంఖా, ఏసీ, ఏర్‌కూలర్‌ వసతులు లేని కాలంలో వేసవిలో విసనకర్రల ద్వారా గాలి సేద తీర్చుకుంటారు.

పంచాంగ శ్రవణం : పంచాంగం అంటే ఐదు అంగములు అని అర్థం. తిథి, నక్షత్రం, వారం, యోగం, కరణం అనే వాటిని పంచాం గాలు అంటారు. పదిహేను తిథులు, ఏడు వారాలు, 27 నక్షత్రములు, 27 యోగములు, 11 కరణములు ఉన్నాయి. వీటన్నింటిని కలిపి పంచాంగం అని అంటారు. కొత్త సంవత్సరంలో రాశి ఫలాలు, గ్రహస్థి తులు ఎలా ఉన్నాయో తెలుసుకొని గ్రహ శాంతుల వంటివి చేస్తారు. పంచాంగ శ్రవణాన్ని చేస్తారు. పూర్వ కాలంలో ఆ ఏడాది పంటలు ఎలా పండబోతున్నాయి. ఏరువాక ఎలా సాగాలి లాంటి విషయాలను తెలుసుకోవడానికి పంచాంగ శ్రవణం మార్గంగా ఎంచుకున్నారు. నిత్య వ్యవహారాల కోసం ప్రస్తుతం గ్రిగేరియన్‌ ఇంగ్లీష్‌ క్యాలెండర్‌ను ఉపయో గిస్తున్నారు. శుభకార్యాలు, పూజలు వంటి వాటికి మాత్రం పంచాంగాన్ని వాడుకుంటారు. ఈ పంచాంగం ఉగాదితో అమలులోకి వచ్చి మళ్లీ ఉగాది వచ్చే వరకు అమలులో ఉంటుంది. పంచాంగాన్ని ఉగాది నాడు వివిధ దేవతలతోపాటు పూజించాలని శాస్త్రాలు చెబు తున్నాయి. గ్రామాలు మొదలు కొని పెద్ద నగరాల్లో చేస్తారు. పూర్వ కాలం లో పంచాంగాలు అందరికి అందుబాటులో ఉండేవి కావు. తాటాకుల మీద రాయబడేవి కనుక పండితుల వద్ద మాత్రమే ఉండేవి. ఉగాది రోజు ఊరంతటికి పంచాంగ శ్రవణం వినిపించేవారు. పంచాంగ శ్రవణంలో సంవత్సర ఫలితాలను వివరిస్తారు. నవ నాయకులను తెలుసుకుని వారి ద్వారా ఫలాలను అంచానా వేస్తారు. సంవత్సరంలో ఏఏ గ్రహాలకు ఏఏ అధికారం లభిస్తుందో తెలుసుకుంటారు. వీరికి లభించే అధికారాన్ని బట్టి సంవత్సరం ఫలితాలు ఉంటాయని అంచనా వేస్తారు.

ఆయనకు నిజంగా తెలంగాణా మీద ప్రేముందా?

దేవాదాయ శాఖ మంత్రి జూపల్లి కృష్ణారావుకు తెలంగాణాపై నిజంగా ప్రేముందా? మంత్రి పదవి అంతగా ఆదాయం వచ్చేది కాదని అప్పుడే నిరసన తెలిపిన మంత్రి ఇంకేదైనా పెద్దపదవి ఆశించి రాజీనామా చేశారా? తెలంగాణాలో భవిష్యత్తులో రాజకీయంగా భవిష్యత్తు ఉంటుందని రాజీనామా చేస్తానంటున్నాడా? అనే సందేహాలు వ్యక్త మవుతున్నాయి. నిజంగా ఆయనకు తెలంగాణామీద లేదా వెనుకబడిన మహబూబ్‌నగర్‌ జిల్లా మీద లేదా ఆయన సొంతనియోజకవర్గం కొల్లాపూర్‌ మీదయినా అభిమానం ప్రేమ ఉందా? . ఉంటే ఇప్పటివరకు ఆయన నియోజకవర్గంలోని పలు గ్రామాలకు రోడ్డు సౌకర్యం లేదు. తాగునీటి సమస్య ఉంది. ఇంకా అనేక ఇబ్బందులున్నాయి. మరి ఎందుకు పట్టించుకోలేదు. వెనుకబడిన నియోజకర్గంలో ఒక్క కళాశాలస్థాపించారా? స్కూలు ఏమయినా ఏర్పాటు చేశారా?. మూడు సార్లు ఎమ్మెల్యే అయి తెలంగాణాలో ఏమి ఉద్దరించారాయన. గత నెలలో తెలంగాణా ప్రాంతం మంత్రులుగా ఉన్నవారు ప్రత్యేక సమావేశమయ్యారు. ఆ ప్రత్యేక సమావేశంతో ఒకరిద్దరు మినహా అందరూ రాజీనామా చేయాలనుకున్నారు. మరి ఎందుకు ఒక్కరే రాజీనామా చేశారు. ఎంపీ కావూరి సాంబశివరావు చేసిన విమర్శలకు స్పందించి రాజీనామా లేక పంపారా?. నిజంగా రాజీనామా చేసే వాడయితే తెలంగాణా రావాలనుకుంటే రాజీనామాను గవర్నర్‌కు ఇవ్వకుండా సోనియాకు ఎందుకు పంపారు. ఈ బెదిరింపు లేఖకు సోనియా గాంధీ స్పందిస్తుందా? . చిదంబరం కరుణిస్తారా?.ఏమయ్యేదుంది.2013 వరకూ ఎలాంటి నిర్ణయం తీసుకోరని కూడా జూపల్లికి కూడా తెలుసు. మంత్రి పదవికి రాజీనామా చేస్తూ లేఖను ఎఐసిసి అధ్యక్షురాలు సోనియాగాంధీకి ఫ్యాక్స్‌ ద్వారా పంపారు. ఆ లేఖ ప్రతిని ముఖ్యమంత్రి కిరణ్‌కుమార్‌రెడ్డికి అందించారు. ప్రత్యేక తెలంగాణ రాష్ట్ర ఏర్పాటుకు అధిష్టానంపై ఒత్తిడి పెంచేందుకే రాజీనామా చేసినట్లు ఆయన ప్రకటించారు. పార్లమెంటు బడ్జెట్‌ సమావేశాలు ముగిసేలోగా ప్రత్యేక రాష్ట్ర ఏర్పాటుకు కేంద్ర ప్రభుత్వం స్పష్టమైన ప్రకటన చేయాలని సోనియాకు పంపిన లేఖలో జూపల్లి డిమాండ్‌ చేశారు. లేకుంటే గవర్నర్‌కు అధికారికంగా లేఖ అందించి రాజీనామాను ఆమోదింప చేసుకుంటానని, అవసరమైతే ఆమరణ నిరాహారదీక్ష చేపడ్తానని చెప్పారు. రాజీనామా ఆమోదం పొందేవరకు పదవిలోనే కొనసాగుతానని, విధులకు హాజరవుతానన్నారు. రాజీనామా విషయాన్ని జూపల్లి కృష్ణారావు గురువారం మధ్యాహ్నం అసెంబ్లీ మీడియా పాయింట్‌లో ప్రకటించారు. అసెంబ్లీ సమావేశాలకు హాజరుకాకుండా సోనియాకు పంపాల్సిన రాజీనామా లేఖపై సచివాలయంలో తన అనుచరులతో మధ్యాహ్నం వరకు చర్చించారు. సభ వాయిదా పడిన తరువాత అసెంబ్లీలో సిఎం కిరణ్‌కుమార్‌రెడ్డిని కలిసి రాజీనామా విషయాన్ని చర్చించారు. సిఎంతో 20 నిమిషాలకు పైగా చర్చించిన తరువాత జూపల్లి మీడియాతో మాట్లాడారు. తెలంగాణ ఉద్యమంలో భాగంగానే అధిష్టానంపై ఒత్తిడి తెచ్చేందుకు మంత్రి పదవికి రాజీనామా చేయాలని నిర్ణయం తీసుకున్నట్లు చెప్పారు. తెలంగాణ ప్రక్రియను ప్రారంభిస్తున్నామని కేంద్రమంత్రి చిదంబరం 2009 డిసెంబర్‌ తొమ్మిదవ తేదీన ప్రకటన చేయడం, తరువాత దానిపై అదే నెల 23న వెనక్కు తీసుకోవడం, ఆ సమయంలో తెలంగాణ ప్రాంతంలో జరిగిన రాజకీయ పరిణామాలను జూపల్లి వివరించారు. విద్యార్థుల ఆత్మహత్యలు తనను ఎంతగానో కలచివేశాయని, ఉస్మానియా యూనివర్సిటీకి వెళ్ళినప్పుడే రాజీనామా చేస్తామని విద్యార్థులకు హామీ ఇచ్చామని చెప్పారు. శ్రీకృష్ణ కమిటీ వేసినప్పుడు ఏడాది పాటు నిరీక్షించినా ఫలితం లేకుండా పోయిందన్నారు. పార్లమెంటు బడ్జెట్‌ సమావేశాల్లోగా తెలంగాణ బిల్లు పెట్టి నిర్ధిష్ట ప్రకటన చేయాలన్నారు. లేకుంటే రాజీనామా చేస్తామని అధిష్టానానికి గతంలోనే లేఖ రాశామని గుర్తు చేశారు. తెలంగాణ ప్రాంతంలో జరుగుతున్న పరిస్థితిని సోనియాకు తెలిసేందుకు అన్ని విషయాలను లేఖలో చేర్చినట్లు చెప్పారు. 'తెలంగాణ ఉద్యమాల గడ్డ, 50 ఏళ్ల నుండి ఉద్యమం నడుస్తోంది. 1969లో 300 మందికిపైగా చనిపోయారు. ఇప్పుడు 600 మంది మృతిచెందారు. తెలంగాణ సాధన కోసం ఒకపక్క ఉద్యమాలు, ఉద్యోగుల సహాయ నిరాకరణ, రైల్‌రోకోలు, బంద్‌లు జరుగుతున్నాయి. విద్యార్థుల ఆత్మహత్యలు ఆగడం లేదు. మరోవైపు అన్నిపార్టీల తెలంగాణ ప్రాంత ఎమ్మెల్యేలు అసెంబ్లీని బహిష్కరించారు. అయినా కేంద్రం స్పందించడం లేదు. తెలంగాణాలో అన్నివర్గాల ప్రజలు పోరాడుతుంటే తాము అసెంబ్లీలో గుడ్లప్పగించి చూడటం సరికాదు. మాకూ చీమూ, నెత్తురూ, పౌరుషం ఉంది. అందుకే తెలంగాణ కోసం మంత్రి పదవిని వదులుకోవడానికి సిద్ధమయ్యా' అని జూపల్లి ఆవేశంగా అన్నారు. పదవుల్లేకుండా అరగంట కూడా ఉండలేమని కొంతమంది సీమాంధ్ర ప్రాంత నేతలు అంటున్నారు. నోరుంది కదాని ఇష్టానుసారంగా మాట్లాడుతున్నారని, వారే తెలంగాణ రాకుండా అడ్డుకుంటున్నారని ఆరోపించారు. తనకు కాంగ్రెస్‌ పార్టీ టికెట్‌ ఇచ్చిదినందునే సోనియాకు రాజీనామా లేఖ పంపానని ఒక ప్రశ్నకు సమాధానంగా చెప్పారు. తెలంగాణాపై అధిష్టానం ఏ నిర్ణయమూ ప్రకటించని పక్షంలో తన రాజీనామా లేఖను గవర్నర్‌కు అందిస్తానన్నారు. ఆత్మ ప్రభోదానుసారం తానొక్కడినే రాజీనామా చేశానన్నారు. సోనియాగాంధీ తెలంగాణ ఇస్తుందన్న నమ్మకముందన్నారు.

ప్రణబ్‌ ముఖర్జి బడ్జెట్‌కు సెన్సెక్స్‌కు లింకేమిటి?

ప్రణబ్‌ముఖర్జి బడ్జెట్‌ ప్రవేశపెట్టగానే స్టాక్‌ మార్కెట్లో సెన్సెక్స్‌ పెరిగిపోయింది. స్టాక్‌ మార్కెట్‌కు బడ్జెట్‌కు లింకేమిటి స్టాక్‌ మార్కెట్‌ అనగానే ఇదంతా పెట్టుబడి దారులకు సంబంధించింది. స్టాక్‌ మార్కెట్‌ లాభాల్లో నడుస్తుందంటే ప్రణబ్‌ముఖర్జి బడ్జెట్‌కూడా పెట్టుబడి దారులకు అనుకూలమైనదనేగా అర్థం. యుపిఎ -1 ప్రభత్వ హయాంలో చిదంబరం ఆర్థిక మంత్రిగా ఉండగా వామపక్షాల మద్దతుతో మన్మోహన్‌ సింగ్‌ ప్రభుత్వం ఏర్పాటయింది. అప్పుడు పార్లమెంటులో బడ్జెట్‌ పవేశపెట్టిగానే సెన్సెక్స్‌ పడిపోయింది. అంటే అప్పుడు మెజార్టీ ప్రజలకు ఉపయోగపడే తరహాలో బడ్జెట్‌ ఉన్నది. కొన్ని వ్యాపార సంస్థలకోసం కాకుండా అన్ని వర్గాల ప్రజలను దృష్టిలో ఉంచుకుని ఆనాటి బడ్జెట్‌ అంటే రాజకీయ డాక్యుమెంటు తయారు చేశారు. ఈనాడు అంటే 2011-12 బడ్జెట్‌ మాత్రం ప్రజల ప్రయోజనాలను విస్మరించిందనే చెప్పవచ్చు.బహుళజాతి సంస్థలు తయారు చేసిన కార్పొరేట్‌ కంపెనీల డాక్యుమెంటులా ఉంది. ఒక పక్కధరలు విపరీతంగా పెరిగాయి. సామాన్యులు కష్టాల్లో ఉన్నారు. అన్ని స్థాయిల్లో అవినీతి పెరిగి పోయింది. నల్లధనం నిల్వలు పెరిగిపోయాయి. ఇలాంటి తరుణంలో వాటిని అదుపు చేయడానికి ప్రభుత్వం చేసిన ప్రయత్నం శూన్యం. కేవలం ఆందోళన వ్యక్తం చేస్తే ధరలు తగ్గుతాయా? అవినీతి తగ్గుతుందా? పేదల ఆదాయం పెరుగుతుందా? ఒక పిల్లవాడికి గణితంలో మార్కులు తక్కువగా వస్తున్నాయంటే మార్కులు పెంచడానికి ప్రత్యేక ప్రయత్నం చేయాలి. ట్యూషన్‌ చెప్పించాలి. పిల్లవాడికి పౌష్టికాహారం ఇప్పించాలి. కాని మార్కులు తగ్గడానికి గల కారణాలను అన్వేషిస్తాం. నల్లధనాన్ని అదుపు చేయడానికి ఐదంచెల విధానాన్ని రూపొందిస్తామని ప్రకటనలు చేయడం. ఆహార ధాన్యాల ఉత్పత్తి పెరగడానికి వ్యవసాయానికి సబ్సిడీలు ఇవ్వకుండా ఆందోళన కలిగిస్తుందని ప్రకటన చేస్తే సరిపోతుందా?.

2011-12 వార్షిక పేదలకు మాటలు చెప్పి విదేశీ బహుళజాతి సంస్థలకు, స్వదేశీ సంపన్నులకు మూటలు కట్టబెట్టేలా ఉంది. కాకులను కొట్టి గద్దలకు దోచిపెట్టడమంటే ఇదే. రోజుకు ఇరవై రూపాయలు కూడా ఖర్చు చేయలేని పేదలు, అరకొర ఆదాయాలతో బతుకీడుస్తున్న సామాన్య, మధ్యతరగతి జీవులు కలిపి దేశంలో 95 శాతం మంది ఉన్నారు. భారీసంఖ్యలో ఉన్న ఈ జనాలకు విదల్చడమో లేక వారి వంక చూడకపోవడమో చేసిన ఆర్థిక మంత్రి సంపన్నులకు మాత్రం రెండు చేతులతో తవ్వి పోశారు. ప్రజా వ్యతిరేక బడ్జెట్‌ను ప్రతిపాదించారు. ద్రవ్యోల్బణాన్ని ఆదుపు చేస్తామంటూనే ఆందోళన కలిగిస్తున్న ఆహార ద్రవ్యోల్బణంపై నోరుమెదపలేదు సరికదా ఆహార పదార్ధాల ధరలు పెరుగుతాయన్నారు. ధరల నియంత్రణపై చేతులెత్తేశారు. ఆహార భద్రత బిల్లును ఈ ఏడాదిలో పార్లమెంట్‌లో ప్రవేశపెడతామంటూనే, సబ్సిడీలకు కోత పెట్టారు. సబ్సిడీలను నగదు రూపంలో చెల్లిస్తాం, కిరోసిన్‌, గ్యాస్‌, ఎరువులకు కూపన్లు ఇస్తాం అంటూ సబ్సిడీలను దిగ్గోస్తామని ప్రణబ్‌ బాహాటంగా ప్రకటించారు. బడ్జెట్‌లో నిరుటి కంటే 27 కోట్లు కోత పెట్టారు. డీజిల్‌, పెట్రోలు ధరల పెంపుతో అన్ని వస్తువుల ధరలూ పెరిగి సామాన్యులు అవస్థలు పడుతున్నారు, పెట్రోలియం ఉత్పత్తులపై కష్టమ్స్‌, ఎక్సయిజ్‌ సుంకాలు తగ్గిస్తే కొంత వరకూ ధరలు తగ్గుతాయని ప్రతిపక్షాలు, ప్రధానంగా వామపక్షాలు నెత్తీనోరు మొత్తుకున్నా ప్రభుత్వం పెడచెవినపెట్టింది. బడ్జెట్‌లో ఆ ఊసు లేదు. వ్యవసాయంలో యాంత్రీకరణను ప్రవేశపెట్టడానికి వీలుగా భారీ యంత్రాలపై దిగుమతి సుంకాన్ని తగ్గించారు. ఏడాదిలో వ్యవసాయ కూలీలకు వంద రోజులు పని కల్పించాలని జాతీయ ఉపాధి హామీ పథకాన్ని ప్రవేశపెట్టిన చేత్తోనే భారీ యంత్రాలను ప్రోత్సహించడం ఏం నీతి? ఉపాధి హామీ కార్మికుల వేతనాలు పెంచామని కొండంతరాగం తీసిన ఆర్థిక మంత్రి గతేడాది కంటే ఈ బడ్జెట్‌లో వందకోట్లు తగ్గించి ఆమాద్మీకి ప్రాధాన్యమిచ్చామంటే ఎలా చెల్లుబాటవుతుంది? వృద్ధాప్య పింఛన్లకు వయో పరిమితి తగ్గించి ఆ మేరకు పెరగనున్న పింఛన్లకు నిధులు కేటాయించలేదు.
వినాశకర సంస్కరణల వల్ల ప్రజలు ఇబ్బందులు పడుతున్నా, ప్రజల నుండి నిరసనలు మిన్నంటుతున్నా వాటినే పట్టుకు వేలాడుతోంది యుపిఎ-2 సర్కార్‌. భవిష్యత్తులో ఆ 'సంస్కరణ'లనే అమలు చేస్తామని విత్త మంత్రి నిస్సిగ్గుగా ఢంకా భజాయించారు. ప్రభుత్వరంగ సంస్థల్లో పెట్టుబడులను గతేడాది కంటే 15 వేల కోట్లు ఎక్కువగా అంటే 40 వేల కోట్లు ఉపసంహరిస్తున్నట్లు సెలవిచ్చారు. మౌలిక వసతుల రంగంలో విదేశీ పెట్టుబడులకు ఉవ్విళ్లూరుతూ పెట్టుబడులు రావాలంటే భారీ రాయితీలు తప్పనిసరని కుతర్కం వినిపించారు. కార్పొరేట్లపై సర్‌ ఛార్జి 7.5 శాతం నుండి 5 శాతానికి ఉదారంగా తగ్గించేశారు. వేతన జీవులకు ఆదాయ పరిమితి 1.6 లక్షల నుండి 1.8 లక్షలకు పెంచినట్లు ఫోజు పెట్టినప్పటికీ పెరుగుతున్న ధరల నేపథ్యంలో ఈ పెంపు ఏ మాత్రం సరిపోదు. గతంలో మహిళలకు, పురుషులకు మధ్య ఆదాయ పన్ను పరిమితి తేడా ఉండేది. ఈసారి పురుషులతో సమానం చేసి మహిళలకు ఇంతకాలం ఉన్న ఆ మాత్రం ప్రోత్సాహకాన్ని సైతం లేకుండా చేశారు. ఆదాయ పరిమితి పెంపువల్ల ప్రత్యక్ష పన్నుల నుండి 11,500 కోట్లు ఆదాయం తగ్గుతుందన్నప్పటికీ అదే జనం నుండి పరోక్ష పన్నుల ద్వారా సర్కార్‌ 11,300 కోట్లు గుంజుతోంది. ఒక చేత్తో ఇచ్చి మరో చేత్తో అడుక్కోవడమంటే ఇదే. వ్యవసాయం రంగం సంక్షోభంలో ఉందని ఆర్థిక సర్వేలో పేర్కొన్న విత్త మంత్రి బడ్జెట్‌లో అందుకు తగ్గట్టు కేటాయింపులు చేయలేదు సరి కదా తగ్గించారు. ఈ రంగంలో ప్రభుత్వ, ప్రైవేట్‌ భాగస్వామ్యం అంటూ విదేశీ సంస్థలకు తలుపులు బార్లా తెరిచి కార్పొరేట్‌ వ్యవసాయాన్ని నిస్సిగ్గుగా ప్రవేశపెడతామన్నారు. కార్పొరేట్‌, కాంట్రాక్టు వ్యవసాయం వల్ల పేద, చిన్న సన్నాకారు రైతులు తీవ్రంగా నష్టపోతారు. వ్యవసాయ రుణాలపై మూడు శాతం వడ్డీ రాయితీ, రుణాల పెంపు అంటున్నా పేదలకు అవి బహుదూరంగా ఉన్నాయి. రైతుల ఆత్మహత్యలు, కౌలు రైతుల వ్యధలపై ఈ బడ్జెట్‌లో మాట మాత్రం లేకుపోవడం ప్రభుత్వ దగాకోరు విధానాలకు నిదర్శనం.
యుపిఎ-2 ప్రభుత్వంలో అవినీతికి హద్దూ అదుపు లేకుండా పోయింది. అవినీతి కట్టడికి మంత్రివర్గ ఉపసంఘాన్ని నియమిస్తామన్న హామీ కంటితుడుపునకే పనికొస్తుంది. విదేశీ బ్యాంకుల్లో మూలుగుతున్న నల్లధనం వ్యవహారంపై రోజుకో విన్యాసం చేస్తున్నారు ప్రణబ్‌. నల్లధనం వెలికితీతపై ఐదంచెల వ్యవస్థ కూడా ప్రజలను మభ్యపెట్టడానికే తప్ప చిత్తశుద్ధితో నల్లధనాన్ని రప్పించడానికి కాదని ఇప్పటికే ప్రజలకు అర్థమైపోయింది. ఆర్థిక రంగంలో కీలకమైన బీమా, బ్యాంకింగ్‌, పెన్షన్‌ నిధుల వంటి వాటిని సరళీకరించే చట్టాలను వేగంగా అమలు చేస్తామనడం వెనుక విదేశీ పెట్టుబడుల మార్కెట్‌ను సంతృప్తి పర్చే రంధి దాగుంది. దానిలో భాగంగానే ప్రైవేటు బ్యాంకులకు లైసెన్సులిస్తామన్నారు. భారతీయ మ్యూచువల్‌ ఫండ్స్‌ను మరింత సరళీకరించడం ద్వారా విదేశీ పెట్టుబడులను అందుబాటులోకి తేవడమంటే ఆశల పల్లకిలో విహరించినట్లే అవుతుంది. భారత కరెంట్‌ అకౌంట్‌ లోటు మరింత పెరగడానికి దోహద పడుతుంది. పెట్టుబడి వ్యయం జిడిపిలో 1.7 శాతం నుండి 1.2 శాతానికి తగ్గడం వల్ల ప్రజలకు అవసరమైన మౌలిక వసతుల కల్పనపై నీలి నీడలు అలముకున్నాయి. జిడిపి గతేడాది కంటే 14 శాతం మేరకు పెరగ్గా ప్రణాళికా బడ్జెట్‌ నిరుటికంటే 12 శాతమే పెరిగింది. సమాజంలోని మహిళ, దళితులు, మైనార్టీలు, గిరిజనుల సంక్షేమానికి జరిపిన కేటాయింపులు పూర్తి అసమగ్రంగా ఉన్నాయి. మహిళలు మైక్రోఫైనాన్స్‌ సంస్థల వేధింపులు, అధిక వడ్డీలతో ఇబ్బందులపాలవుతుండగా మైక్రో సంస్థల కోసం బడ్జెట్‌లో వంద కోట్లు కేటాయించడం అత్యంత దుర్మార్గం. మొత్తమ్మీద ప్రణబ్‌ బడ్జెట్‌ యుపిఎ ఆమాద్మీ ఎజెండాను పక్కనపెట్టి నయా సరళీకరణ విధానాలను దూకుడుగా అమలు చేయాలనే లక్ష్యాన్ని ప్రతిబింబిస్తోంది.

తిరోగమన పథంలో మమత రైలు

రైల్వే బడ్జెట్‌ చరిత్రలో 2011 ఫిబ్రవరి 25 చిరస్థాయిగా నిలిచిపోతుంది. అయితే ఈవిధంగా నిలిచిపోవటానికి కారణం ఏదో సాధించినందువల్ల కాదు. ఏమీ సాధించలేకపోవటం వల్లనే. సాధారణంగా బడ్జెట్‌ అంటే గత సంవత్సరం పని తీరును పరిశీలించుకుని అసంపూర్ణంగా మిగిలిన లక్ష్యాలను, అందుకు కారణాలను మదింపు చేసుకోవటం, ఆ వెలుగులో వర్తమాన కర్తవ్యభారం స్వీకరించటం. మమతా బెనర్జీ ప్రతిపాదించిన రైల్వే బడ్జెట్‌లో ఈ మూడింటిలో ఏదీ జరగలేదు. ఒకసారి మంత్రిగారి ఉపన్యాసం విన్న వారికి, చదివిన వారికి ఎవరికైనా ఈ బడ్జెట్‌ 2011-2012 సంవత్సరానికే లేక రానున్న దశాబ్ద కాలానికా, అర్థదశాబ్దానికా అన్న సందేహం కలుగుతుంది. ప్రతిపాదించిన కొత్త రైల్వే లైన్ల సర్వే మొదలు, లైను డబ్లింగ్‌ వరకూ, స్టేషన్‌ నిర్మాణాల మొదలు, సంబంధిత పరిశ్రమల నిర్మాణాల వరకూ 12వ పంచవర్ష ప్రణాళికలో చేపడతామని బడ్జెట్‌ ప్రసంగం చెప్తోంది. ఇంకా మనం 11వ పంచవర్ష ప్రణాళిక ముగింపు దశకు చేరుకోలేదు. ఇక 12వ ప్రణాళికా కాలంలో చేపట్టం అంటే సదరు ప్రాజెక్టులు కాగితాలకే పరిమితం కావటం అని ప్రత్యేకంగా చెప్పనవసరం లేదు. భారత ఆర్థిక వ్యవస్థ కంటే రైల్వేల ప్రగతి వేగవంతంగా ఉందని చెప్పిన మంత్రి దానికనుగుణంగా మిగిలిన పనులు చేపట్టకపోవటం ఆశ్చర్యం కలిగిస్తుంది.
నిపుణుల అంచనా ప్రకారం ఆర్థిక వ్యవస్థ 9 శాతం వృద్ధి రేటుతో ముందుకెళ్తుంటే రవాణా రంగం ప్రత్యేకించి రైల్వే 11 శాతం వృద్ధిరేటు సాధించాలి. అప్పుడే విస్తరిస్తున్న ఆర్థిక వ్యవస్థ అవసరాలను తీర్చటానికి సాధ్యమవుతుంది. దీనికి భిన్నంగా గత రెండేళ్లుగా భారత రైల్వే విస్తరణ రైల్వేబోర్డు మాజీ సభ్యుల అంచనాల మేరకు కేవలం 5 శాతానికి పడిపోయింది. రైల్వేల ఆర్థికశక్తి సామర్ధ్యాలకు, మనుగడకు ఆపరేషన్‌ రేషియో కీలకం. వంద రూపాయాల ఆదాయం సాధించటానికి ఎన్ని రూపాయలు ఖర్చు పెట్టాల్సి వస్తుందో దాన్ని ఆపరేషన్‌ నిష్పత్తిగా నిర్ధారిస్తారు. నాలుగేళ్ల క్రితం వరకూ 76 శాతంగా ఉన్న ఈ నిష్పత్తి గత రెండు సంవత్సరాల్లో 95 శాతానికి పెరిగింది. వాస్తవిక అంచనాలు, నిధుల లభ్యత, ద్రవ్యోల్బణం వంటివి పరిగణలోకి తీసుకుంటే ఈ నిష్పత్తి 115చేరుతుంది. అంటే వంద రూపాయలు సంపాదించటానికి భారత రైల్వే 115 రూపాయలు ఖర్చుపెడుతోంది. దక్షిణ మధ్య రైల్వేలో వందరూపాయల సంపాదనకు 146 రూపాయలు ఖర్చు పెడుతున్నారు. అంటే మొత్తంగా భారత రైల్వే సగటున 15 శాతం లోటులో నడుస్తోంది. బహుశా భారతరైల్వే చరిత్రలో ఇంత అథమ స్థాయిలో ఎన్నడూ లేని పరిస్థితిని నేడు రైల్వేలు చవిచూస్తున్నాయి.
మొత్తం ఆర్థిక వ్యవస్థకు ఎక్కిన ప్రభుత్వ ప్రైవేటు భాగస్వామ్యం మత్తు రైల్వే శాఖకూ ఎక్కింది. ఈ విధానం కింద 52 ప్రాజెక్టులు గత సంవత్సరం ప్రారంభించారు. వీటి ప్రగతి గురించి ఒక్కమాట కూడా బడ్జెట్‌ ప్రసంగంలో లేదు. కేవలం ఇవన్నీ ఈ సంవత్సరం పూర్తవుతాయి, సమగ్ర పరిశీలన దశలో ఉన్నాయి అన్న మాటలు తప్ప వీటి గురించి మరిన్ని వివరాలు కనిపించవు. రైల్వేల విస్తరణకు మూల నిధి ఖాతా, అభివృద్ధి నిధి ఖాతాలు కీలకం. ఈ రెండు ఖాతాల్లో నిధులు నామమాత్రపు దశకు చేరుకోవటంతో ప్రభుత్వ ప్రైవేటు భాగస్వామ్యం పథకాలకు కేటాయించాల్సిన మేర కూడా రైల్వే శాఖ వద్ద నిధులు లేవు. దాంతో ఈ పథకం కింద వచ్చిన ప్రతిపాదనలన్నింటినీ మూటకట్టి అటకెక్కించారు. మరో ముఖ్యమైన విషయం మిగులు నిధుల పద్దు. ఈ పద్దు నుండే తక్షణ వ్యయం సమకూర్చబడుతుంది. 2007-2008లో 25000 కోట్ల రూపాయలు ఉంటే 2010-2011 ఆర్థిక సంవత్సరానికి ఈ నిధులు 1328 కోట్లకు కుదించుకుపోయాయి. నూతన పథకాలు, ప్రాజెక్టులు చేపట్టకపోవటానికి ఇదీ మూల కారణం. ఈ విషయాన్ని దాచిఉంచటానికి రైల్వే శాఖ శాయశక్తులా ప్రయత్నిస్తోంది. విస్తరణ విషయంలోనూ బడ్జెట్‌ సంతృప్తికరంగా లేదు. గత సంవత్సరం బడ్జెట్‌లో సంవత్సరానికి వెయ్యి కిలోమీటర్ల రైల్వే లైన్ల నిర్మాణం పూర్తిచేస్తామని లక్ష్యంగా పెట్టుకొంది. 2009లో ప్రకటించిన విజన్‌ 2020 పత్రం ప్రకారం 2020 నాటికి దేశంలో అదనంగా మరో 2,5000 కిలోమీటర్ల కొత్త రైలు మార్గాలు నిర్మాణం జరగాలి. అంటే మరో ఎనిమిదేళ్లలో ఈ నిర్మాణాలు పూర్తి కావాలి. అయితే దీనికి సంబంధించి శక్తి సామర్ధ్యాలు, శ్రామికులు, నిధులు, స్థల సేకరణ, ప్రణాళికల తయారీ గురించి పల్లెత్తు మాట లేకుండానే బడ్జెట్‌ ప్రసంగం ముగిసింది. పైగా ఈ సంవత్సరానికి మరో 800 కిలోమీటర్ల రైల్వే లైన్ల నిర్మాణం కొత్తగా చేపడతామని డాబుసరిప్రకటనకు మాత్రం బడ్జెట్‌లో చోటు దక్కింది. ప్రభుత్వ ప్రైవేటు భాగస్వామ్యం కింద ఈపాటికేవచ్చిన ప్రతిపాదనలు కార్యరూపం దాల్చకపోగా మరో ఏడు రంగాల్లో ఇటువంటి ప్రాజెక్టులు చేపట్టాలని బడ్జెట్‌ ప్రతిపాదిస్తోంది. మరో 190 రైల్వే లైన్లకు సంబంధించి సర్వే పూర్తి చేయటానికి 12వ పంచవర్ష ప్రణాళిక కాలాన్ని లక్ష్యంగా నిర్ధారించుకుంది. ఆంధ్రప్రదేశ్‌ ప్రజలు దీర్ఘకాలంగా ఎదురు చూస్తున్న భద్రాచలం కొవ్వూరు రైల్వే లైను సర్వే కూడా ఏకంగా పన్నెండవ ప్రణాళికా కాలానికి గెంటివేయబడింది. అంటే కేవలం సర్వేకే మరో ఐదేళ్లు పడితే, 2017 నాటికి పూర్తి అయ్యేట్లయితే కేవలం మిగిలిన మూడు సంవత్సరాల్లో నిర్మాణం ఎలా పూర్తవుతుందన్నది ఎవరికీ అంతుబట్టని బ్రహ్మ రహస్యంగానే మిగిలిపోయింది.

రైల్వేల విస్తరణకు కీలకమైన ఇంజనీరింగ్‌, కోచ్‌, వ్యాగన్‌ పరిశ్రమల నిర్మాణానికి ప్రభుత్వం ఎంచుకున్న కేంద్రాలు పరిశీలిస్తే రైల్వే శాఖ మానసిక స్థితి గురించి సందేహాలు రాకపోవు. జమ్ము కాశ్మీర్‌లో రైలు బ్రిడ్జిలు, మణిపూర్‌లో డీజిల్‌ ఇంజన్లు తయారు చేసి దేశమంతటా పంపిణీ చేస్తామన్న మంత్రి ప్రకటన వెనక భారతదేశ భౌగోళిక పరిస్థితులు, దానికున్న పరిమితులు గురించిన అవగాహన లోపం స్పష్టంగా కనిపిస్తుంది. ఉత్తరాఖండ్‌ కొన్ని సరిహద్దు ప్రాంతాలకు రోడ్డు నిర్మాణానికి కావల్సిన యంత్ర సామాగ్రిని తరలించాలంటే కనీసం ఆర్నెల్ల వ్యవధి అవసరం. అటువంటిది జమ్ము కాశ్మీర్‌లో తయారు చేసిన రైలు బ్రిడ్జి సామగ్రి దేశంలో మిగిలిన ప్రాంతాలకు చేరవేయటానికి ఎంత సమయం పడుతుంది ? అసలు జమ్ము కాశ్మీర్‌ నుండి దేశంలోని మిగిలిన ప్రాంతాలకు మధ్య ఉన్న రైల్వే నెట్‌వర్క్‌ ఎంత? అందులో వ్యాగన్‌లు తరలించగలిగిన నెట్‌వర్క్‌ ఎంత అన్నది పరిశీలిస్తే ఈ ప్రతిపాదనల హేతుబద్దతను ప్రశ్నించకుండా ఉండలేము. అదేవిధంగా మణిపూర్‌లో నిర్మించిన డీజిలు ఇంజన్లను కనీసం ఈశాన్యభారతంలోని ఏడు రాష్ట్రాలకు చేరవేయటానికే ఏళ్ల గడువు పడుతుంది. అటువంటిది మిగిలిన దేశానికి చేరవేయటానికి ఉన్న సాధనాల గురించి కూడా పరిశీలించకుండా ప్రాజెక్టు ప్రతిపాదనలు తయారు చేసిందీ ప్రభుత్వం. ఏతావాతా చెప్పాలంటే ఈ బడ్జెట్‌ అత్యంత అశ్రద్ధతో, అసమంజస ప్రతిపాదనలతో, వచ్చే సంవత్సరాల కోసం రూపొందించిన బడ్జెట్‌ తప్ప కనీసం రానున్న ఆర్థిక సంవత్సరానికి ప్రతిపాదించిన బడ్జెట్‌ కాదు అన్నది స్పష్టంగా రూఢి అవుతోంది.

ఆంధ్రప్రదేశ్‌లో కాంగ్రెస్‌ ప్రభుత్వం పడిపోతుందా?

ఆంధ్రప్రదేశ్‌లో కాంగ్రెస్‌ ప్రభుత్వం కూలుతుందని ఒక చర్చ నడుస్తోంది. రాజకీయ పరిశీలకుల అంచనాలకు అందకుండా ఎపిలో మార్పులు జరుగుతున్నాయి. వైఎస్‌ రాజశేఖర్‌రెడ్డి మరణించాక ముఖ్యమంత్రి ఎవరనేది చర్చనడిచింది. రోశయ్య తాత్కాలిక ముఖ్యమంత్రి మాత్రమే ఎవరనేది తరువాత నిర్ణయిస్తామని అధిష్టానం చెప్పింది. ఈలోపు వైఎస్‌ జగన్‌ ముఖ్యమంత్రి కావాలని కొందరు అధిష్టానంపై ఒత్తిడి తెచ్చారు. రాజశేఖర్‌రెడ్డి ఆస్తికి మాత్రమే జగన్‌ వారసుడు...రాజకీయ వారసుడు కాదు అని ఒకచర్చ నడిచింది. ఇదిలా ఉండగానే తెలంగాణా ప్రత్యేక రాష్ట్రం వ్యవహారంతో రాష్ట్రంలో ప్రభుత్వం పడిపోతుంది మధ్యంతర ఎన్నికలు వస్తాయేమో అనుకున్నారు. తెలంగాణా అంశాన్ని అధ్యయనం చేయడానికి నియమించిన శ్రీకృష్ణ కమిటీ నివేదిక రాగానే రాష్ట్రం అళ్లకల్లోలం అవుతుందని ఒక విశ్లేషణ నడిచింది. కాంగ్రెస్‌ అధిష్టానం ఈలోపు రాష్ట్రంలో పరిస్థితిని అంచనా వేసి రోశయ్యను ముఖ్యమంత్రి పదవినుంచి తప్పించింది. ఇటు జగన్‌కు, అటు తెలంగాణా రాష్ట్రం ఏర్పాటు అంశాన్ని రెండింటినీ అదుపులోకి తెచ్చే తరహాలో అధిష్టానం ఆలోచించింది. ఎవరూ ఊహించని తరహాలో కిరణ్‌కుమార్‌రెడ్డిని ముఖ్యమంత్రిని చేసింది. కిరణ్‌కుమార్‌రెడ్డి తెలంగాణావాడా, రాయలసీమవాడా అనే చర్చనడిచింది. ఈలోపు శ్రీకృష్ణ కమిటీ రిపోర్టు రానే వచ్చింది. రిపోర్టులో ఏమున్నా కాంగ్రెస్‌ అధిష్టానమే తెలంగాణా అంశాన్ని తేల్చాలనేది తెలిసిందే. జగన్‌పార్టీ పార్టీ పెడుతాడు ఈలోపు మెజార్టీ ఎమ్మెల్యేలు జగన్‌ వెంట వెళ్తారని ప్రభుత్వం పడిపోయే ప్రమాదముందని విశ్లేషకులు భావించారు. తెలంగాణా అంశాన్ని తేల్చక ముందే జగన్‌పార్టీ రాకముందే ప్రజారాజ్యం పార్టీని కాంగ్రెస్‌లో విలీనం చేయడానికి అధిష్టానం పావులు కదిపింది. కాంగ్రెస్‌లో విలీనం కావడానికి ప్రజారాజ్యం అంగీకరించింది. రాబోయే బడ్జెట్‌ సమావేశాల్లో అసెంబ్లీలో మెజార్టీ ఓటింగుకోసం ఎమ్మెల్యేల బలాన్ని కూడగట్టే ప్రయత్నం చేసింది. చర్చబండ మొదలెట్టి ఎమ్మెల్సీ ఎన్నికలకు నోటిఫికేషన్‌ విడుదల చేసింది. రచ్చబండలో వచ్చిన చిన్నచిన్న సమస్యలను పరిష్కరించి త్వరలో మున్సిపల్‌ ఎన్నికలకు నోటిఫికేషన్‌ విడుదల చేస్తుంది. ఈలోపు తెలంగాణా వాదులు ఎన్నికలను బహిష్కరిస్తామని ప్రకటిస్తారు. మరో సారి మున్సిపల్‌ ఎన్నికల్లో బలాన్ని నిరూపించుకోవాలని చూస్తారు. పుణ్యకాలం దగ్గర పడుతుంది. ప్రజల సమస్యలు పెరుగుతూనే ఉంటాయి. ఒక్కో అంశాన్ని ఇలా కాంగ్రెస్‌ దాటుతూ చివరికి తెలంగాణాలోని టిఆర్‌ఎస్‌ను కాంగ్రెస్‌లో విలీనం చేసుకుని తెలంగాణా రాష్ట్రం ప్రకటించడానికి ప్రయత్నిస్తుంది. 2013 వరకు తెలంగాణా విషయం ఎటూ తేల్చదు. 2013లో కూడా ఎందుకు తేల్చుతుందంటే తెలంగాణాలో ఎవరు పోటీ చేసినా గెలిచే పరిస్థితి లేదు. సెంటిమెంటుతో ఉన్న ప్రజలు ఇతర పార్టీలను అర్థం చేసుకునే పరిస్థితి ఉండదు కాబట్టి తెలంగాణా అంశాన్ని అడ్డుపెట్టుకుని ప్రతిపక్షాలను దెబ్బతీయడానికి ప్రయత్నిస్తుంది. తెలంగాణా వాదులు ఉద్యమం ఉదృతం చేస్తే 2013లోపే ఒక నిర్ణయం తీసుకుని తెలంగాణాలోనూ సీమాంధ్రలోనూ లబ్ధిపొందే ప్రయత్నం చేస్తుంది. కాని అంత సులభంగా ఆంధ్రప్రదేశ్‌లో అధికారాన్ని వదులుకునే పని కాంగ్రెస్‌ మాత్రం చేయదు. ఎందుకంటే ఆంధ్రప్రదేశ్‌, తమిళనాడు రెండు రాష్ట్రాలు డిస్టర్బ్‌ అయితే యుపిఎ -2కు నష్టం వాటిల్లే ప్రమాదం ఉంది. ఎందుకంటే ఎక్కువమంది ఎంపీలు తమిళనాడు, ఆంధ్రప్రదేశ్‌ రెండు రాష్ట్రాల్లో కాంగ్రెస్‌వాళ్లు ఉండటం ప్రధాన కారణం. కాబట్టి కాంగ్రెస్‌ అధిష్టానం ఆంధ్రప్రదేశ్‌లోని కాంగ్రెస్‌ ప్రభుత్వాన్ని 2014 వరకూ కాపాడుకోచ్చు. అవినీతి, అధికధరలు, ప్రజల అన్ని రకాల సమస్యలు పెరుగుతున్నాయి. వాటిలో డబ్బుతో ముడిపడి ఉన్న అంశాలు కాకుండా కొన్నింటికి ఈలోపు పరిష్కారం చూపవచ్చు. ప్రజల సమస్యల నుంచి దృష్టి మళ్లేందుకు స్థానిక ఎన్నికలు, తెలంగాణా వేర్పాటు వాదం వంటి వాటిని చర్చకు తెస్తారు పాలకులు. ప్రజలు అర్థం చేసుకుని తిరగబడనంతకాలం ప్రజలను మోసం చేస్తూనే ఉంటారు.

అమెరికాలో కర్నూలు వాసి మృతి

ఆంధ్రప్రదేశ్‌లోని కర్నూలు నగరం గణేష్‌నగర్‌కు చెందిన రంజిత్‌కుమార్‌ శనివారం అమెరికాలో అనుమానాస్పదంగా మృతి చెందాడు. వారంతపుసెలవు కావడంతో భార్యాభర్తలిద్దరూ విందుకు వెళ్లి భోజనం చేశారు. ఇంటికి వచ్చాక రంజిత్‌కుమార్‌ కోమాలోకి వెళ్లాడు. ఆయనను ఆసుపత్రికి తరలించగా మృతిచెందాడు. మహబూబ్‌నగర్‌ జిల్లా అలంపూర్‌ మండలం సుల్తానాపురం గ్రామానికి చెందిన సూరిబాబు కుమారుడు రంజిత్‌కుమార్‌ ఆరేళ్లుగా అమెరికాలో సాఫ్ట్‌వేర్‌ ఇంజనీర్‌గా పని చేస్తున్నాడు. సుల్తానాపురం తుంగభద్ర నదికి కర్నూలు జిల్లా వైపు ఉండడంతో వారు చాలాకాలంగా కర్నూలు నగరం గణేష్‌ నగర్‌లో నివాసముంటున్నారు. సూరిబాబు ప్రస్తుతం మానవపాడు మండలం పుల్లూరు గ్రామ కార్యదర్శిగా పని చేస్తున్నారు. సూరిబాబుకు ఒక కుమారుడు, ఒక కుమార్తె. రంజిత్‌కుమార్‌ అమెరికాలో అనుమానాస్పదంగా మృతి చెందడంతో వారి కుటుంబం శోకసంద్రంలో మునిగిపోయింది. రంజిత్‌కుమార్‌ కోమాలో ఉన్న పరిస్థితిలో నుంచి ఆస్పత్రికి తరలించగా అక్కడ మృతి చెందాడు. రంజిత్‌కుమార్‌కు గత ఏడాది నవంబర్‌లో వివాహమయింది. ప్రస్తుతం భార్య శిల్పా కూడా అమెరికాలోనే ఉంది.

మా ఆవిడ మీద ఒట్టు నీ ప్రియురాలు చాలామంచిది!

భార్య ప్రేమ కోసం భర్త పోరాటం

తను పెళ్లి చేసుకున్న యువతి మరో యువకున్ని ప్రేమిస్తోందని తెలిసి వారిద్దరినీ కలిపేందుకు ఆ భర్త నిశ్చయించుకున్నాడు. ఇక్కడి వరకు కథ బాగానే ఉన్నా ప్రేమించిన యువకుడు పెళ్లికి నిరాకరించడంతో కథ అడ్డం తిరిగింది. ఇది '' హమ్‌దిల్‌ దే చుకే సనమ్‌ '' సినిమా గుర్తుకొస్తుంది కదూ ... ఇలాంటివి తెలుగులో కూడా సినిమాల్లో చూశాం... కాని నిజజీవితంలో జరిగిన ఈ సంఘటన. మూడేళ్లుగా తన వెంట తిప్పుకున్న ప్రియురాలిని చెల్లెలు వరుస అవుతుందంటూ ప్రియుడు ప్లేటు ఫిరాయించాడు. పెళ్లి చేసుకోవడం కుదరదంటూ తేల్చి చెప్పాడు. దీంతో ఆగ్రహం చెందిన ప్రియురాలి భర్త కాలనీ వాసులతో కలిసి ప్రియుడు పనిచేసే ఫ్యాక్టరీ వద్ద ఆందోళనకు దిగారు. ఇందుకు సంబంధించిన వివరాలను పరిశీలిద్దాం....
ఆంధ్రప్రదేశ్‌లోని నంతపురం జిల్లా హిందూపురం వీవర్స్‌ కాలనీలో నివాసముంటున్న పవిత్రకు తన బావ ధనుంజరుతో మూడు నెలల క్రితం పెళ్లయింది. పెళ్లికి ముందే ఆమె అదే కాలనీకి చెందిన గోపిని ప్రేమించింది. పెళ్లయిన తరువాత కూడా ఈ ప్రేమ కొనసాగింది. ఓ రోజు ఈ విషయంపై భర్త ఆమెను నిలదీయగా తాను గోపిని ప్రేమిస్తున్నట్లు చెప్పింది. ఇది విన్న ఆయన ప్రేమికులిద్దరినీ కలిపేందుకు నిశ్చయించుకున్నాడు. పవిత్రను పెళ్లి చేసుకోవాలని గోపిని కోరాడు. ఇక్కడే కథ అడ్డం తిరిగింది. పవిత్ర తనకు చెల్లెలు వరుస అవుతుందని ఆమెను పెళ్లి చేసుకోవడం కుదరదని తేల్చి చెప్పాడు. విషయం తెలుసుకున్న కాలనీ వాసులు గోపి పనిచేసే ఫ్యాక్టరీ వద్ద శుక్రవారం ఆందోళన చేపట్టారు. గోపి పెళ్లికి ఒప్పుకోక పోవడంతో పవిత్ర భర్తతో కలిసి పోలీసులను ఆశ్రయించింది. తనకు న్యాయం చేయాలని విజ్ఞప్తి చేసింది. వారిని పిలిచి పోలీసులు చర్చలు జరిపారు. చర్చలు విఫలమయ్యాయి. వారు ఒప్పుకోక పోవడంతో ఈ సమస్య ఓ కొలిక్కి రాలేదు.